Cornelius a Lapide
Index
Synopsis Capitis
David Ammonitas tribulis et serris comminuit, mox, vers. 4, tribus præliis Philistæos superat, et tres gigantes occidit.
Textus Vulgatae: 1 Paralipomenon 20:1-8
1. Factum est autem post anni circulum eo tempore quo solent reges ad bella procedere, congregavit Joab exercitum et robur militiæ, et vastavit terram filiorum Ammon; perrexitque et obsedit Rabba: porro David manebat in Jerusalem, quando Joab percussit Rabba, et destruxit eam. 2. Tulit autem David coronam Melchom de capite ejus, et invenit in ea auri pondo talentum, et pretiosissimas gemmas, fecitque sibi inde diadema: manubias quoque urbis plurimas tulit; 3. populum autem, qui erat in ea, eduxit: et fecit super eos tribulas, et trahas, et ferrata carpenta transire, ita ut dissecarentur et contererentur; sic fecit David cunctis urbibus filiorum Ammon, et reversus est cum omni populo suo in Jerusalem. 4. Post hæc initum est bellum in Gazer adversum Philistæos, in quo percussit Sobochai Husathites, Saphai de genere Raphaim, et humiliavit eos. 5. Aliud quoque bellum gestum est adversus Philistæos, in quo percussit Adeodatus filius saltus Bethlehemites fratrem Goliath Gethæi, cujus hastæ lignum erat quasi liciatorium texentium. 6. Sed et aliud bellum accidit in Geth, in quo fuit homo longissimus, senos habens digitos, id est, simul viginti quatuor: qui et ipse de Rapha fuerat stirpe generatus. 7. Hic blasphemavit Israel, et percussit eum Jonathan filius Samaa fratris David. Hi sunt filii Rapha in Geth, qui ceciderunt in manu David et servorum ejus.
Hoc caput idem est cum cap. X et XI, lib. II Reg. ubi illud explicui.
Versus 2: Corona Melchom
Tulit autem David coronam Melchom. — Hebræi Malcham מלכם, id est regis eorum, scilicet Ammonitarum. Ita et Septuaginta; nam corona idolorum, qualis erat Melchom, comburenda erat cum ipsis idolis, uti jubetur Deut. VII; quare ex ea coronam regalem sibi fabricare nequibat David.