Cornelius a Lapide
Index
Invocatio et Plagae Aegypti
Lauda, Jerusalem, Dominum: lauda Deum tuum, Sion. Quis loquetur potentias Domini: auditas faciet omnes laudes ejus? In exitu Israel de Aegypto: domus Jacob de populo barbaro. Facta est Judaea sanctificatio ejus: Israel potestas ejus.
Intravit enim Israel in Aegyptum: et Jacob accola fuit in terra Cham. Auxit ibi Deus populum suum vehementer: et firmavit eum super inimicos ejus. Convertit cor eorum, ut odirent populum ejus: et dolum facerent in servos ejus. Misit ad Pharaonem Mosen servum suum, et Aaronem electum Domini. Posuit in eis verba signorum suorum, et prodigiorum in terra Cham.
Convertit aquas eorum in sanguinem: et occidit pisces eorum. Edidit terra eorum ranas: in penetralibus regum ipsorum. Dixit, et venit coenomyia: et ciniphes in omnibus finibus eorum. Posuit pluvias eorum grandinem, ignem comburentem in terra ipsorum. Et percussit vineas eorum et ficulneas eorum: et contrivit lignum finium eorum. Dixit, et venit locusta: et bruchus, cujus non erat numerus. Et comedit omne foenum in terra eorum, et omnem fructum terrae eorum. Misit tenebras, et obscuravit: perculit eos igne et spectris in nocte horrenda. Percussit omne primogenitum in terra eorum: primitias omnis laboris eorum.
Exitus ex Aegypto
Eduxit Hebraeos cum argento et auro: quibus spoliaverunt Aegyptum. Egressus est populus Dei in exultatione: et electi ejus in laetitia. Laetata est Aegyptus in profectione eorum: quia incubuit timor eorum super eos. Expandit Dominus nubem in protectionem eorum: et ignem, ut luceret eis per noctem.
Transitus Maris Rubri
Audivit Pharao eos concludi mari Rubro, dixit: Persequar, et interficiet eos manus mea. Ingressus est post eos cum curribus et equitibus suis in mare: et reduxit super eos Dominus aquas maris. Filii autem Israel ambulaverunt per siccum: in medio ejus, quasi in deserto. Cantemus Domino, gloriose enim magnificatus est: equum et ascensorem dejecit in mare.
Beatus es tu, Israel, quis similis tui? popule, qui salvaris in Domino. Ascensor coeli auxiliator tuus: ipse est scutum auxilii tui et gladius gloriae tuae. Dominus quasi vir pugnator: omnipotens nomen ejus. Currus Pharaonis et exercitum ejus projecit in mare: electi principes ejus submersi sunt in mari Rubro. Abyssi operuerunt eos: descenderunt in profundum quasi lapis. In spiritu furoris tui, Domine, congregatae sunt aquae; stetit unda fluens utrimque instar murorum: donec pertransiret populus tuus, quem possedisti. Flavit spiritus tuus, et operuit Aegyptios mare: submersi sunt quasi plumbum, in aquis vehementibus. Quis similis tui in fortibus, Domine? quis similis tui? magnificus in sanctitate, terribilis atque laudabilis, et faciens mirabilia.
Maria prophetissa duxit chorum mulierum, eisque cum tympano praecinuit: Cantemus Domino gloriose. Praelusit illa B. Mariae Deiparae, matri Jesu, qui nos inferno liberavit: quam proinde beatam dicent omnes generationes.
Manna, Aqua, et Victoria contra Amalec
Petierunt Hebraei carnes, et venit coturnix: dedit eis Deus manna, et pane coeli saturavit eos. Panem angelorum manducavit homo: cibaria misit eis in abundantia. In Raphidim eduxit aquam de petra: et adaquavit eos, velut in abysso multa.
Venit Amalec, pugnans contra Israel: orante Mose, contrivit eum Josue.
Lex Sinai
In Sina descendit Deus in igne, fumo, procellis et buccina: voce tubali Decalogum promulgavit. Dedit Mosi praecepta, judicia et caeremonias: quibus foedus sanxit cum Hebraeis.
Arca et Tabernaculum
Jussit fabricare arcam foederis, Cherubim et propitiatorium: mensam panum propositionis et candelabrum aureum. Tabernaculum, cortinas, vectes, atrium: et in eo altare holocaustorum, cum labro aeneo. Altare quoque thymiamatis, cum incenso: Aaroni dedit sacerdotium gentis.
Vestes Sacerdotales Aaronis
Circumcinxit eum zona: et induit eum stolam gloriae. Femoralibus, tunica, humerali et rationali vestivit eum: posuit in eo duodecim gemmas, quasi stemmata et magnalia duodecim tribuum Israel.
Urim et tummim insculpsit ei: ut veritas doctrinae et perfectio vitae conderentur in pectore sacerdotis. In veste poderis totus erat orbis terrarum: cinxit illum tintinnabulis aureis, plurimis in gyro. Dare sonitum in incessu suo, auditum facere pulsum in templo: in memoriam filiis gentis suae. Coronam auream dedit super mitram ejus: expressam signo sanctitatis et gloria honoris: sanctum Domino.
Haec omnia operati sunt Beseleel et Ooliab: quos implevit Dominus spiritu sapientiae, ad fabricandum ea.
Vitulus Aureus et Tabulae Legis
Tardante Mose in Sina, Hebraei fecerunt vitulum aureum: et adoraverunt sculptile. Et mutaverunt gloriam suam in similitudinem vituli comedentis foenum. Obliti sunt Deum, qui salvavit eos, qui fecit magnalia in Aegypto: mirabilia in terra Cham, terribilia in mari Rubro. Et dixit, ut disperderet eos: si non Moses electus ejus stetisset in confractione, in conspectu ejus. Dicens: Dimitte eis hanc noxam: aut dele me de libro tuo quem scripsisti. Stetit Moses in petra: vidit tergum et gloriam Domini. Cornua lucis afflavit ei Dominus: dedit ei duas tabulas inscriptas Decalogo.
Fecit Moses tabernaculum cum vasis suis: erexit illud in templum Domino.
Doxologia
Laudate Dominum de coelis: laudate eum in excelsis. Laudate eum in tympano et choro: laudate eum in chordis et organo. Laudate eum in cymbalis jubilationis: omnis spiritus laudet Dominum.
Gloria Patri, et Filio, et Spiritui Sancto: sicut erat in principio, et nunc, et semper, et in saecula saeculorum, Amen.