Cornelius a Lapide
Index
Argumentum
Pertexitur hic genealogia Judae Patriarchae a Phares filio ejus usque ad Davidem, ex quo prognatus est Christus, hoc fine ut Christus (quem quasi scopum et finem tota S. Scriptura respicit) ostendatur natus ex Juda, uti promiserat et praedixerat Jacob Juda filio suo benedicens, Gen. XLIX, 10. Inducitur autem hic in hanc genealogiam Ruth Moabitis et Gentilis, sed mox facta fidelis et proselyta, qui miro casu vel potius Dei providentia in eam subintroivit aeque ac Rahab Chananaea: «Ut ostenderet, ait S. Hieronymus, non dedignatum ex peccatoribus nasci, qui venerat ut omnium peccata deleret, utque gentium vocatio et electio Judaeis exclusis a Christo facienda, in Ruth gentili et avia Christi significaretur.» Tropologice, ut in Ruth idea et exemplar piae, modestae et sanctae uxoris daretur. Symbolice, ut indicaretur nobilitatem generis dari a Deo, utpote qui Ruth gentilem, vilem et pauperem ascivit in familiam Abrahae et Judae, eamque fecit genitricem Davidis et posterorum, quin et ipsius Christi. Unde Ruth a Rabbinis et S. Chrysostomo, et B. Petro Damiano vocatur «Mater regni et regum.» Omnes enim reges Juda ab ea descenderunt.
Est hic liber appendix libri Judicum, unde et ab Hebraeis illi annectitur: ejus enim historia contigit sub Judicibus, ut patet cap. 1, vers. 1. Estque praeludium et quasi manuductio ad librum Regum; in eo enim gesta Davidis et caeterorum regum ex Ruth prognatorum describuntur. Quocirca recto ordine interjicitur hic liber inter librum Judicum et Regum. Porro hic liber ab omnibus tam Catholicis quam Haereticis (excipio Manichaeos, qui totum vetus Testamentum, ac consequenter et librum Ruth, velut a Deo malo profectum rejiciebant et blasphemabant, teste S. Augustino in libris Contra Faustum) habitus fuit Canonicus S. Scripturae, esto in nonnullis Arabicis, utpote manuscriptis duntaxat non exstet.
Auctor libri est incertus; a nonnullis enim censetur fuisse Ezechias rex, ab aliis Esdras, a pluribus vero Samuel, idque verisimilius videtur, tum quia Samuel sub hoc tempus vixit, tum quia ipse librum primum Regum conscripsit, ad quem hic liber dirigitur.
Scripserunt in Ruth Rupertus, Abulensis, Lyranus, Hugo, Dionysius, Cajetanus, Serarius, ac Fevardentius, qui pulchra et plurima morum documenta ex hoc libro elicit.