Cornelius a Lapide
Index
Synopsis Capitis
David arcam e Cariathiarim reducens, coram ea psallit et salit. Oza arcam tangens occiditur. Arca divertens in domum Obededom, eam benedicit.
Textus Vulgatae: 1 Paralipomenon 13:1-14
1. Iniit autem consilium David cum tribunis, et centurionibus, et universis principibus, 2. et ait ad omnem cœtum Israel: Si placet vobis, et a Domino Deo nostro egreditur sermo quem loquor, mittamus ad fratres nostros reliquos in universas regiones Israel, et ad sacerdotes, et Levitas, qui habitant in suburbanis urbium, ut congregentur ad nos, 3. et reducamus arcam Dei nostri ad nos: non enim requisivimus eam in diebus Saul. 4. Et respondit universa multitudo ut ita fieret: placuerat enim sermo omni populo. 5. Congregavit ergo David cunctum Israel, a Sihor Ægypti, usque dum ingrediaris Emath, ut adduceret arcam Dei de Cariathiarim. 6. Et ascendit David, et omnis vir Israel, ad collem Cariathiarim, qui est in Juda, ut afferret inde arcam Domini Dei sedentis super cherubim; ubi invocatum est nomen ejus. 7. Imposueruntque arcam Dei super plaustrum novum, de domo Abinadab: Oza autem, et frater ejus, minabant plaustrum. 8. Porro David, et universus Israel, ludebant coram Deo omni virtute in canticis, et in citharis, et psalteriis, et tympanis, et cymbalis, et tubis. 9. Cum autem pervenissent ad Aream Chidon, tetendit Oza manum suam ut sustentaret arcam: bos quippe lasciviens paululum inclinaverat eam. 10. Iratus est itaque Dominus contra Ozam, et percussit eum, eo quod tetigisset arcam: et mortuus est ibi coram Domino. 11. Contristatusque est David, eo quod divisisset Dominus Ozam: vocavitque locum illum: Divisio Ozæ, usque in præsentem diem. 12. Et timuit Deum tunc temporis, dicens: Quomodo possum ad me introducere arcam Dei? 13. Et ob hanc causam non adduxit eam ad se, hoc est, in Civitatem David; sed avertit in domum Obededom Gethæi. 14. Mansit ergo arca Dei in domo Obededom tribus mensibus: et benedixit Dominus domui ejus, et omnibus quæ habebat.
Versus 5: A Sihor Aegypti
5. A Sihor Ægypti. — Sihor Hebraice שיהור Sichor, id est niger, vocatur Nilus, quod aqua ejus, quia limosa et turbida, videatur esse nigra. Unde a Græcis vocatur μελας, id est niger; verum, quia Nilus longe abest a Judæa, melius per Sihor accipias rivum juxta Rhinocoluram, qui est terminus Australis Judææ, et alibi «torrens Ægypti» vocatur, de quo dixi Num. cap. XXXIV, vers. 5.
Versus 7: Oza et Frater Ejus
7. Oza autem et frater ejus. — II Reg. VI, 3, habetur: «Oza et Ahio,» sed Ahio Hebraice idem est quod frater ejus, vereque hic Ahio erat frater Ozæ: uterque enim erat filius Abinadab, ut ibi dicitur. Chidon alio nomine vocabatur Nachon ut patet II Reg. VI, 6.