Cornelius a Lapide
Index
Synopsis Capitis
Accensentur 12 Principes, qui vicissim per 12 anni menses praeerant 24 millibus militum. Insuper Principes singularum tribuum, ac Officiales Davidis, tum qui domi rebus domesticis, tum qui foris ejus vineis, agris, bobus, camelis, ovibus praeerant.
Textus Vulgatae: 1 Paralipomenon 27:1-34
1. Filii autem Israel secundum numerum suum, principes familiarum, tribuni, et centuriones, et praefecti, qui ministrabant regi juxta turmas suas, ingredientes et egredientes per singulos menses in anno, viginti quatuor millibus singuli praeerant. 2. Primae turmae in primo mense Jesboam praeerat filius Zabdiel, et sub eo viginti quatuor millia. 3. De filiis Phares, princeps cunctorum principum in exercitu mense primo. 4. Secundi mensis habebat turmam Dudia Ahohites, et post se alter nomine Macelloth, qui regebat partem exercitus viginti quatuor millium. 5. Dux quoque turmae tertiae in mense tertio, erat Banaias filius Joiadae sacerdos: et in divisione sua viginti quatuor millia. 6. Ipse est Banaias fortissimus inter triginta; at super triginta, praeerat autem turmae ipsius Amizabad filius ejus. 7. Quartus, mense quarto, Azahel frater Joab, et Zabadias filius ejus post eum: et in turma ejus viginti quatuor millia. 8. Quintus, mense quinto, princeps Samaoth Jezerites: et in turma ejus viginti quatuor millia. 9. Sextus, mense sexto, Hira filius Acces Thecuites: et in turma ejus viginti quatuor millia. 10. Septimus, mense septimo, Helles Phallonites de filiis Ephraim: et in turma ejus viginti quatuor millia. 11. Octavus, mense octavo, Sobochai Husathites de stirpe Zarahi: et in turma ejus viginti quatuor millia. 12. Nonus, mense nono, Abiezer Anathothites de filiis Jemini: et in turma ejus viginti quatuor millia. 13. Decimus, mense decimo, Marai, et ipse Netophathites de stirpe Zarai: et in turma ejus viginti quatuor millia. 14. Undecimus, mense undecimo, Banaias Pharathonites de filiis Ephraim: et in turma ejus viginti quatuor millia. 15. Duodecimus, mense duodecimo, Holdai Netophathites, de stirpe Gothoniel: et in turma ejus viginti quatuor millia. 16. Porro tribubus praerant Israel, Rubenitis, dux Eliezer filius Zechri: Simeonitis, dux Saphatias filius Maacha: 17. Levitis, Hasabias filius Camuel: Aaronitis, Sadoc: 18. Juda, Eliu frater David: Issachar, Amri filius Michael: 19. Zabulonitis, Jesmaias filius Abdiae: Nephthalitibus, Jerimoth filius Ozriel: 20. filiis Ephraim, Osee filius Ozaziu; dimidiae tribui Manasse, Joel filius Phadaiae: 21. et dimidiae tribui Manasse in Galaad, Jaddo filius Zachariae; Benjamin autem, Jasiel filius Abner. 22. Dan vero, Ezrihel filius Jeroham: hi principes filiorum Israel. 23. Noluit autem David numerare eos a viginti annis inferius: quia dixerat Dominus ut multiplicaret Israel quasi stellas coeli. 24. Joab filius Sarviae coeperat numerare, nec complevit: quia super hoc ira irruerat in Israel: et idcirco numerus eorum qui fuerant recensiti, non est relatus in fastos regis David. 25. Super thesauros autem regis fuit Azmoth filius Adiel. His autem thesauris, qui erant in urbibus, et in vicis, et in turribus, praesidebat Jonathan filius Oziae. 26. Operi autem rustico, et agricolis qui exercebant terram, praeerat Ezri filius Chelub: 27. vinearumque cultoribus Semeias Romathites: cellis autem vinariis, Zabdias Aphonites. 28. Nam super oliveta et ficeta, quae erant in campestribus, Balanan Gederites: super apothecas autem olei, Joas. 29. Porro armentis, quae pascebantur in Saron, praepositus fuit Setrai Saronites: et super boves in vallibus, Sapphat filius Adli: 30. super camelos vero, Ubil Ismahelites: et super asinos, Jadias Meronathites. 31. Super oves quoque, Jaziz Agareus. Omnes hi, principes substantiae regis David. 32. Jonathan autem patruus David, consiliarius, vir prudens et litteratus: ipse et Jahiel filius Hachamoni erant cum filiis regis. 33. Achitophel etiam consiliarius regis, et Chusai Arachites amicus regis. 34. Post Achitophel fuit Joiada filius Banaiae, et Abiathar. Princeps autem exercitus regis erat Joab.
Nota: Sicut David duobus capitibus praeced. Sacerdotes aeque ac Levitas, in 24 classes distribuit, quae vicissim Deo in templo hebdomadatim deservirent; sic hic reliquum populum, puta Israelitas ad bellum idoneos, in 12 classes distribuit, et cuique classi suum praeficit principem, ut singulae classes vicissim semel in anno per mensem Regi et Reipublicae ad bellum deserviant, ut scilicet vicissim 24 millia armatorum cum suo duce sibi sint praesto ad omnem bellicam expeditionem.
Fuit haec politica et prudens Davidis sanctio; tum ut hac ratione omnes subditos exerceret in armis, ut discerent belligerare; tum ad sui regnique tutelam. Cum enim Israelitae pauci undique hostibus cingerentur, scilicet Philisthaeis, Idumaeis, Ammonitis, Arabibus, Aegyptiis, necessum fuit eis semper paratos esse ad bellum. Ne ergo subita hostium irruptione opprimerentur, statuit David, ut 24 millia semper in armis pro regis regnique custodia excubarent, et hostibus irruentibus illic occurrerent. Hoc autem subditis non erat grave, quia uno tantum mense in anno quisque cum armis in aciem prodire debebat, reliquis vero mensibus domi res suas curabat. Rursum, hac ratione parcebatur exactionibus pecuniarum, quae ingentes pro exercitu conscribendo et alendo indici solent. Nam quisque suo mense, quo in exercitu armatus comparere debebat, seipsum alebat. Hac ratione effecit, ut semper ad manum haberet numerosum militem, eumque recentem et veteranum, ut quibusvis et quantisvis hostibus resistere posset: quia pro numero hostium poterat tot millia ex singulis classibus evocare quos opus erat.
Denique totus Israelis populus distributus in duodecim classes bellatorum, constabat quasi totidem exercitibus validis: quaeque enim classis constabat 24 millibus armatorum, suumque habebat ducem sive principem, quorum quilibet hic ordine suo recensetur. Dux autem quilibet suum habebat vicarium, qui ei aegrotanti vel aliis occupato succederet, et classem ejus in aciem duceret regeretque, ut patet vers. 4 et 7. Sic Romani olim rerum domini multas semper legiones in armis habebant, easque per provincias distribuebant, ut eas in officio et obedientia continerent, ac provinciarum sumptibus alebant. Sic Chinenses semper in armis habent centum millia militum, qui contra Tartaros excubant, ne Chinam invadant.
Versus 4: Et Post Se Alter Nomine Macelloth
4. Et post se alter nomine Macelloth, q. d. Dudiae, qui dux erat secundae turmae, absenti vel impedito datus fuit vicarius Macelloth, qui ejus vice turmam duceret, uti jam dixi.
Versus 7: Et Zabadias Filius Ejus Post Eum
7. Et Zabadias filius ejus post eum, q. d. Asaheli principi quartae turmae datus fuit vicarius ejus filius Zabadias.
Versus 16: Tribubus Praerant
16. Porro tribubus praerant. Hic recensentur singularum duodecim tribuum principes, qui erant earum primogeniti. At vero militiae principes non erant hi primogeniti, sed viri animo, robore et scientia militari praestantes, ideoque a Davide selecti.
Versus 23: Super Hoc Ira Irruerat in Israel
23. Quia super hoc ira (Dei) irruerat super Israel. Deus enim ob numeratum a Davide populum, immisit pestem quae 70 millia absumpsit. Vide dicta II Reg. ult.
Versus 34: Post Achitophel Joiada et Abiathar
34. Post Achitophel fuit Joiada filius Banaiae, et Abiathar. q. d. Achitopheli consiliario Davidis vita per laqueum functo successit Joiada et Abiathar Pontifex, qui Davidi fuere ab intimis consiliis.