Cornelius a Lapide
Index
Synopsis Capitis
Recensentur per familias Judæi, qui cum Esdra e Babylone redierunt in Judæam. Item vasa, munera, hostiæ quas Deo obtulerunt.
Textus Vulgatae: I Esdrae 8:1-36
1. Hi sunt ergo principes familiarum, et genealogia eorum, qui ascenderunt mecum in regno Artaxerxis regis de Babylone. 2. De filiis Phinees, Gersom. De filiis Ithamar, Daniel. De filiis David, Hattus. 3. De filiis Secheniæ, filiis Pharos, Zacharias: et cum eo numerati sunt viri centum quinquaginta. 4. De filiis Phahath Moab, Elioenai filius Zarehe, et cum eo ducenti viri. 5. De filiis Secheniæ, filius Ezechiel, et cum eo trecenti viri. 6. De filiis Adan, Abed filius Jonathan, et cum eo quinquaginta viri. 7. De filiis Alam, Isaias filius Athaliæ, et cum eo septuaginta viri. 8. De filiis Saphatia, Zebedia filius Michael, et cum eo octoginta viri. 9. De filiis Joab, Obedia filius Jahiel, et cum eo ducenti decem et octo viri. 10. De filiis Selomith, filius Josphiæ, et cum eo centum sexaginta viri. 11. De filiis Bebai, Zacharias filius Bebai, et cum eo viginti octo viri. 12. De filiis Azgad, Johanan filius Eccetan, et cum eo centum et decem viri. 13. De filiis Adonicam, qui erant novissimi: et hæc nomina eorum: Elipheleth, et Jehiel, et Samaias, et cum eis sexaginta viri. 14. De filiis Begui, Uthai et Zachur, et cum eis septuaginta viri. 15. Congregavi autem eos ad fluvium, qui decurrit ad Ahava, et mansimus ibi tribus diebus, quæsivique in populo, et in Sacerdotibus de filiis Levi, et non inveni ibi. 16. Itaque misi Eliezer, et Ariel, et Semeiam, et Elnathan, et Jarib, et alterum Elnathan, et Nathan, et Zachariam, et Mosollam principes: et Joiarib, et Elnathan sapientes. 17. Et misi eos ad Eddo, qui est primus in Chasphiæ loco, et posui in ore eorum verba, quæ loquerentur ad Eddo, et fratres ejus Nathinæos, in loco Chasphiæ, ut adducerent nobis ministros domus Dei nostri. 18. Et adduxerunt nobis per manum Dei nostri bonam super nos, virum doctissimum de filiis Moholi, filii Levi filii Israel, et Sarabiam et filios ejus et fratres ejus decem et octo, 19. et Hasabiam, et cum eo Isaiam de filiis Merari, fratresque ejus et filios ejus viginti. 20. Et de Nathinæis, quos dederat David et principes ad ministeria Levitarum, Nathinæos ducentos viginti: omnes hi suis nominibus vocabantur. 21. Et prædicavi ibi jejunium juxta fluvium Ahava, ut affligeremur coram Domino Deo nostro, et peteremus ab eo viam rectam nobis et filiis nostris, universæque substantiæ nostræ. 22. Erubui enim petere a rege auxilium et equites, qui defenderent nos ab inimico in via, quia dixeramus regi: Manus Dei nostri est super omnes qui quærunt eum in bonitate: et imperium ejus, et fortitudo ejus, et furor super omnes qui derelinquunt eum. 23. Jejunavimus autem, et rogavimus Deum nostrum per hoc: et evenit nobis prospere. 24. Et separavi de principibus Sacerdotum duodecim, Sarabiam, et Hasabiam, et cum eis de fratribus eorum decem. 25. Appendique eis argentum, et aurum, et vasa consecrata domus Dei nostri, quæ obtulerat rex et consiliatores ejus, et principes ejus, universusque Israel eorum qui inventi fuerant: 26. et appendi in manibus eorum argenti talenta sexcenta quinquaginta, et vasa argentea centum, auri centum talenta: 27. et crateres aureos viginti, qui habebant solidos millenos, et vasa æris fulgentis optimi duo, pulchra ut aurum. 28. Et dixi eis: Vos sancti Domini, et vasa sancta, et argentum et aurum quod sponte oblatum est Domino Deo patrum nostrorum, 29. vigilate et custodite, donec appendatis coram principibus Sacerdotum, et Levitarum, et ducibus familiarum Israel in Jerusalem, in thesaurum domus Domini. 30. Susceperunt autem Sacerdotes et Levitæ pondus argenti, et auri, et vasorum, ut deferrent Jerusalem in domum Dei nostri. 31. Promovimus ergo a flumine Ahava, duodecimo die mensis primi, ut pergeremus Jerusalem: et manus Dei nostri fuit super nos, et liberavit nos de manu inimici, et insidiatoris in via. 32. Et venimus Jerusalem, et mansimus ibi tribus diebus. 33. Die autem quarta appensum est argentum, et aurum, et vasa in domo Dei nostri, per manum Meremoth filii Uriæ Sacerdotis, et cum eo Eleazar filius Phinees, cumque eis Jozabed filius Josue, et Noadaia filius Bennoi Levitæ, 34. juxta numerum et pondus omnium: descriptumque est omne pondus in tempore illo. 35. Sed et qui venerant de captivitate filii transmigrationis, obtulerunt holocautomata Deo Israel, vitulos duodecim pro omni populo Israel, arietes nonaginta sex, agnos septuaginta septem, hircos pro peccato duodecim: omnia in holocaustum Domino. 36. Dederunt autem edicta regis satrapis, qui erant de conspectu regis, et ducibus trans Flumen, et elevaverunt populum et domum Dei.
Versus 1: Qui Ascenderunt Mecum
1. Qui ascenderunt mecum. — Hinc patet Esdram hunc catalogum scripsisse, ipsumque esse hujus libri auctorem.
Versus 13: Qui Erant Novissimi
13. Qui erant novissimi, — id est qui ultimo loco Esdræ se associarunt, ut cum eo redirent in Jerusalem.
Versus 17: Eddo Qui Est Primus in Chasphiae Loco
17. Et misi eos ad Eddo, qui est primus (princeps) in Chasphiæ loco. — « Chasphia » erat pagus, vel vicus in Babylone, in quo habitabant Judæi separati a Chaldæis, cujus pagi vel vici princeps erat Eddo.
Versus 21: Praedicavi Jejunium
21. Et prædicavi (id est indixi et promulgavi commune) jejunium, etc., ut peteremus ab eo viam rectam, — ut scilicet Deus via recta nos salvos et incolumes per tot hostes, pericula et anfractus deduceret in Jerusalem, omniaque nostra prosperaret.
Versus 23: Rogavimus Deum Nostrum
23. Rogavimus Deum nostrum per hoc, (Hebræus et Septuaginta: Pro hoc, vel propter hoc, ut scilicet propter hoc jejunium dirigeret et prosperaret iter nostrum; quod et fecit: nam) evenit nobis prospere. — Vide hic quam apud Deum potens sit oratio armata jejunio, ut videatur Deo vim inferre ad concedendum id quod petitur.
Versus 27: Crateres Aureos Viginti
27. Et crateres aureos 20 qui habebant (pondus, id est ponderabant) solidos millenos. — Hebræus et Septuaginta, drachmas mille.
Versus 35: Obtulerunt Holocautomata
35. Obtulerunt holocautomata. — Holocaustum proprie erat sacrificium, quo tota victima in honorem Dei cremabatur; sed hic latius sumitur pro qualibet hostia, etiam pro peccato oblata, ut sequitur. Vide dicta Levit. 1 et seq.
Versus 36: Elevaverunt Populum et Domum Dei
36. Et elevaverunt populum, — q. d. Satrapæ et præfecti Persarum exaltarunt Judæos suo patrocinio, favore, ope et opibus, promovendo fabricam templi, animando, adjuvando, annonam præbendo, munera offerendo, uti eis præceperat Artaxerxes cap. præcedenti.