Cornelius a Lapide
Index
Synopsis Capitis
Christus dat signa praevia excidio urbis (Hierosolymae) et orbis: urbis, abominationem desolationis, vers. 14; orbis, praedicationem Evangelii per totum orbem, vers. 10; ac solis et lunae obscurationem, ac casum stellarum de caelo, vers. 24. Denique, vers. 32, docet diem hunc esse omnibus incognitum, ideoque singulos vigilare, et ad illum assidue se comparare debere.
Textus Vulgatae: Marcus 13:1-37
1. Et cum egrederetur de templo, ait illi unus ex discipulis suis: Magister, aspice quales lapides, et quales structurae. 2. Et respondens Jesus, ait illi: Vides has omnes magnas aedificationes? Non relinquetur lapis super lapidem, qui non destruatur. 3. Et cum sederet in monte Olivarum contra templum, interrogabant eum separatim Petrus, et Jacobus, et Joannes, et Andreas. 4. Dic nobis quando ista fient? et quod signum erit quando haec omnia incipient consummari? 5. Et respondens Jesus, coepit dicere illis: Videte ne quis vos seducat: 6. multi enim venient in nomine meo, dicentes, quia ego sum, et multos seducent. 7. Cum audieritis autem bella, et opiniones bellorum, ne timueritis: oportet enim haec fieri, sed nondum finis. 8. Exurget enim gens contra gentem, et regnum super regnum; et erunt terrae motus per loca, et fames. Initium dolorum haec. 9. Videte autem vosmetipsos. Tradent enim vos in conciliis, et in synagogis vapulabitis, et ante praesides et reges stabitis propter me in testimonium illis. 10. Et in omnes gentes primum oportet praedicari Evangelium. 11. Et cum duxerint vos tradentes, nolite praecogitare quid loquamini; sed quod datum vobis fuerit in illa hora, id loquimini: non enim vos estis loquentes, sed Spiritus Sanctus. 12. Tradet autem frater fratrem in mortem, et pater filium; et consurgent filii in parentes, et morte afficient eos. 13. Et eritis odio omnibus propter nomen meum. Qui autem sustinuerit in finem, hic salvus erit. 14. Cum autem videritis abominationem desolationis, stantem ubi non debet: qui legit, intelligat: tunc qui in Judaea sunt, fugiant in montes; 15. et qui super tectum, ne descendat in domum, nec introeat ut tollat quid de domo sua; 16. et qui in agro erit, non revertatur retro tollere vestimentum suum. 17. Vae autem praegnantibus et nutrientibus in illis diebus. 18. Orate vero ut hieme non fiant. 19. Erunt enim dies illi tribulationes tales, quales non fuerunt ab initio creaturae, quam condidit Deus, usque nunc, neque fient. 20. Et nisi breviasset Dominus dies, non fuisset salva omnis caro; sed propter electos, quos elegit, breviavit dies. 21. Et tunc si quis vobis dixerit: Ecce hic est Christus, ecce illic, ne credideritis. 22. Exurgent enim pseudochristi, et pseudoprophetae, et dabunt signa et portenta ad seducendos, si fieri potest, etiam electos. 23. Vos ergo videte: ecce praedixi vobis omnia. 24. Sed in illis diebus, post tribulationem illam, sol contenebrabitur, et luna non dabit splendorem suum; 25. et stellae caeli erunt decidentes, et virtutes, quae in caelis sunt, movebuntur. 26. Et tunc videbunt Filium hominis venientem in nubibus cum virtute multa, et gloria. 27. Et tunc mittet angelos suos, et congregabit electos suos a quatuor ventis, a summo terrae, usque ad summum caeli. 28. A ficu autem discite parabolam. Cum jam ramus ejus tener fuerit, et nata fuerint folia, cognoscitis quia in proximo sit aestas: 29. sic et vos cum videritis haec fieri, scitote quod in proximo sit in ostiis. 30. Amen dico vobis, quoniam non transibit generatio haec, donec omnia ista fiant. 31. Caelum et terra transibunt, verba autem mea non transibunt. 32. De die autem illo vel hora nemo scit, neque angeli in caelo, neque Filius, nisi Pater. 33. Videte, vigilate, et orate: nescitis enim quando tempus sit. 34. Sicut homo, qui peregre profectus reliquit domum suam, et dedit servis suis potestatem cujusque operis, et janitori praecepit ut vigilet. 35. Vigilate ergo (nescitis enim quando Dominus domus veniat: sero, an media nocte, an galli cantu, an mane). 36. Ne cum venerit repente, inveniat vos dormientes. 37. Quod autem vobis dico, omnibus dico: Vigilate.
Versus 1: Quales Structurae
1. QUALES STRUCTURAE. — Quam magnifica fuerit templi et columnarum ejus structura, vide apud Josephum, lib. XV Antiq., cap. XIV, et Bedam, Riberam ac Villalpandum, De Templo.
Versus 6: Dicentes, Quia Ego Sum
6. DICENTES, QUIA (quod) EGO SUM, — scilicet Messias sive Christus, ut habet Matthaeus, XXIV, 5.
Versus 11: Nolite Praecogitare Quid Loquamini
11. NOLITE PRAECOGITARE QUID LOQUAMINI. — Graece, μὴ προμεριμνᾶτε, id est ne praeanxiemini, ne ante solliciti et anxii sitis, ne anxie praecogitetis. Graeca et Syrus addunt: Neque meditemini, qua arte, modo, concinnitate, ratione loquamini et respondeatis praesidibus et tyrannis; «sed quod datum (suggestum a Spiritu Sancto) vobis fuerit in illa hora, id loquimini;» Arabicus: quoniam vos donabimini in illa hora eo quod loquemini; Spiritus Sanctus enim vobis suggeret et animos, et libertatem, et rationes, et modos dicendi, quibus nemo resistere aut contradicere valeat.
Versus 32: De Die Autem Illo Vel Hora Nemo Scit, Neque Angeli In Caelo, Neque Filius, Nisi Pater
32. DE DIE AUTEM ILLO VEL HORA NEMO SCIT, NEQUE ANGELI IN CAELO, NEQUE FILIUS, NISI PATER. — Quomodo hoc intelligendum sit, explicui Matth. XXIV, 36.