Cornelius a Lapide
Index
Synopsis Capitis
Primo, Christus a Pontificibus traditur Pilato, accusatur, Barabbae posthabetur, flagellatur, spinis coronatur, illuditur. Secundo, vers. 21, in Golgotha crucifigitur inter duos latrones; vestes ejus sorte dividuntur; a praetereuntibus blasphematur, quin et a latronibus. Tertio, vers. 33, tenebrae totam terram operiunt, Jesus a Patre se derelictum queritur, ac clamans expirat; unde Centurio ait: Vere hic homo Filius Dei erat. Quarto, vers. 42, a Josepho sepelitur.
Textus Vulgatae: Marcus 15:1-47
1. Et confestim mane consilium facientes summi sacerdotes, cum senioribus, et Scribis, et universo concilio, vincientes Jesum, duxerunt et tradiderunt Pilato. 2. Et interrogavit eum Pilatus: Tu es Rex Judaeorum? At ille respondens, ait illi: Tu dicis. 3. Et accusabant eum summi sacerdotes in multis. 4. Pilatus autem rursum interrogavit eum, dicens: Non respondes quidquam? vide in quantis te accusant. 5. Jesus autem amplius nihil respondit, ut ita miraretur Pilatus. 6. Per diem autem festum solebat dimittere illis unum ex vinctis, quemcumque petiissent. 7. Erat autem qui dicebatur Barabbas, qui cum seditiosis erat vinctus, qui in seditione fecerat homicidium. 8. Et cum ascendisset turba, coepit rogare, sicut semper faciebat illis. 9. Pilatus autem respondit eis, et dixit: Vultis dimittam vobis regem Judaeorum? 10. Sciebat enim quod per invidiam tradidissent eum summi sacerdotes. 11. Pontifices autem concitaverunt turbam, ut magis Barabbam dimitteret eis. 12. Pilatus autem iterum respondens, ait illis: Quid ergo vultis faciam regi Judaeorum? 13. At illi iterum clamaverunt: Crucifige eum. 14. Pilatus vero dicebat illis: Quid enim mali fecit? At illi magis clamabant: Crucifige eum. 15. Pilatus autem volens populo satisfacere, dimisit illis Barabbam, et tradidit Jesum flagellis caesum, ut crucifigeretur. 16. Milites autem duxerunt eum in atrium praetorii, et convocant totam cohortem, 17. et induunt eum purpura, et imponunt ei plectentes spineam coronam. 18. Et coeperunt salutare eum: Ave rex Judaeorum. 19. Et percutiebant caput ejus arundine, et conspuebant eum, et ponentes genua, adorabant eum. 20. Et postquam illuserunt ei, exuerunt illum purpura, et induerunt eum vestimentis suis; et educunt illum ut crucifigerent eum. 21. Et angariaverunt praetereuntem quempiam, Simonem Cyrenaeum, venientem de villa, patrem Alexandri et Rufi, ut tolleret crucem ejus. 22. Et perducunt illum in Golgotha locum, quod est interpretatum Calvariae locus. 23. Et dabant ei bibere myrrhatum vinum, et non accepit. 24. Et crucifigentes eum, diviserunt vestimenta ejus, mittentes sortem super eis, quis quid tolleret. 25. Erat autem hora tertia; et crucifixerunt eum. 26. Et erat titulus causae ejus inscriptus: Rex Judaeorum. 27. Et cum eo crucifigunt duos latrones, unum a dextris, et alium a sinistris ejus. 28. Et impleta est Scriptura, quae dicit: Et cum iniquis reputatus est. 29. Et praetereuntes blasphemabant eum, moventes capita sua, et dicentes: Vah! qui destruis templum Dei, et in tribus diebus reaedificas, 30. salvum fac temetipsum descendens de cruce. 31. Similiter et summi sacerdotes illudentes, ad alterutrum cum Scribis dicebant: Alios salvos fecit, seipsum non potest salvum facere. 32. Christus rex Israel descendat nunc de cruce, ut videamus, et credamus. Et qui cum eo crucifixi erant, conviciabantur ei. 33. Et facta hora sexta, tenebrae factae sunt per totam terram usque in horam nonam. 34. Et hora nona exclamavit Jesus voce magna, dicens: Eloi, Eloi, lamma sabacthani? quod est interpretatum: Deus meus, Deus meus, ut quid dereliquisti me? 35. Et quidam de circumstantibus audientes, dicebant: Ecce Eliam vocat. 36. Currens autem unus, et implens spongiam aceto, circumponensque calamo, potum dabat ei, dicens: Sinite, videamus si veniat Elias ad deponendum eum. 37. Jesus autem emissa voce magna exspiravit. 38. Et velum templi scissum est in duo, a summo usque deorsum. 39. Videns autem centurio, qui ex adverso stabat, quia sic clamans exspirasset, ait: Vere hic homo Filius Dei erat. 40. Erant autem mulieres de longe aspicientes: inter quas erat Maria Magdalene, et Maria Jacobi Minoris et Joseph mater, et Salome: 41. et cum esset in Galilaea, sequebantur eum, et ministrabant ei; et aliae multae, quae simul cum eo ascenderant Hierosolymam. 42. Et cum jam sero esset factum (quia erat Parasceve, quod est ante sabbatum), 43. venit Joseph ab Arimathaea, nobilis decurio, qui et ipse erat exspectans regnum Dei, et audacter introivit ad Pilatum, et petiit corpus Jesu. 44. Pilatus autem mirabatur si jam obiisset. Et accersito centurione, interrogavit eum si jam mortuus esset. 45. Et cum cognovisset a centurione, donavit corpus Joseph. 46. Joseph autem mercatus sindonem, et deponens eum involvit sindone, et posuit eum in monumento, quod erat excisum de petra, et advolvit lapidem ad ostium monumenti. 47. Maria autem Magdalene, et Maria Joseph, aspiciebant ubi poneretur.
Versus 25: Erat Autem Hora Tertia; Et Crucifixerunt Eum
25. ERAT AUTEM HORA TERTIA; ET CRUCIFIXERUNT EUM. — « Tertia, » non inchoans, sed finiens, ac desinens in sextam. Sexta enim hora crucifixum esse Christum, puta in meridie, patet ex vers. 33. Aliqui suspicantur esse mendum, et pro tertia ponendum esse sexta. Hebraei enim diem aeque ac noctem in quatuor partes, sive horas, diviserant; scilicet primam, tertiam, sextam et nonam, quarum quaelibet ternas nostrates horas complectebatur. Prima enim incipiebat ab ortu solis, durabatque tres horas, quibus finitis incipiebat tertia, ac totidem horis durabat, scilicet usque ad meridiem, quando inchoabat sexta et finiebatur tribus post meridiem horis, cum incipiebat nona, durabatque usque ad vesperam: incipiente ergo hora sexta crucifixus est Christus, inchoante vero nona mortuus. Hac de re plura dicam Joan. cap. XIX, vers. 14.
Versus 28: Et Cum Iniquis Reputatus Est
28. ET CUM INIQUIS REPUTATUS EST. — Hebraice, נמנה nimna, id est numeratus, recensitus est. Vide dicta Isaiae LIII, 12. Causa fuit, quia Christus nostrum locum, numerum et censum in se recepit; nos autem eramus iniqui: ipse ergo cum iniquis accensitus est, ut nos ex iniquis faceret aequos, justos et sanctos.
Versus 42: Quia Erat Parasceve, Quod Est Ante Sabbatum
QUIA ERAT PARASCEVE, QUOD EST ANTE SABBATUM. — Graece, quod est prosabbatum. Parasceve idem est quod praeparatio: unde sic vocatur feria sexta, quia in ea praeparabantur cibi et necessaria pro sabbato, quo operari non licebat; hinc vocatur ipsa prosabbatum, sive pridie sabbati, aut vigilia sabbati. Antesabbatum ergo unica est dictio respondens Graeco προσάββατον.